Explore "Kirsty's Opinion" by Violet Jacob on Textopian. Read with annotations and highlights.
Fine div I ken what ails yon puddock, Janet, / That aince would hae her neb set up sae hie; / There's them that disna' seem to understan' it, / I'se warrant ye it's plain eneuch to me!
Maybe ye'll mind her man -- a fine wee cratur, / Owre blate to speak (puir thing, he didna' daur); / What gar'd him fecht was jist his douce-like natur'; / Gairmans is bad, but Janet's tongue was waur.
But noo he's hame again, ye wadna ken her, / He isna' feared to contradic' her flat; / He smokes a' day, comes late to get his denner, / (I mind the time she'd sort him weel for that!)
What's gar'd her turn an' tak' a road divairgint? / Ye think she's wae[4] because he wants a limb? / Ach! haud yer tongue, ye fule -- "the man's a sairgint," / An' there's nae argy-bargyin' wi' "him"!