Explore "Songs of Angus: THE WILD GEESE" by Violet Jacob on Textopian. Read with annotations and highlights.
"O tell me what was on yer road, ye roarin' norlan' Wind, / As ye cam' blawin' frae the land that's niver frae my mind? / My feet they traivel England, but I'm dee'in for the north." / "My man, I heard the siller tides rin up the Firth o' Forth."
"Aye, Wind, I ken them weel eneuch, and fine they fa' an' rise, / And fain I'd feel the creepin' mist on yonder shore that lies, / But tell me, ere ye passed them by, what saw ye on the way?" / "My man, I rocked the rovin' gulls that sail abune the Tay."
"But saw ye naething, leein' Wind, afore ye cam' to Fife? / There's muckle lyin' 'yont the Tay that's mair to me nor life." / "My man, I swept the Angus braes ye hae'na trod for years." / "O Wind, forgi'e a hameless loon that canna see for tears!"
"And far abune the Angus straths I saw the wild geese flee, / A lang, lang skein o' beatin' wings, wi' their heids towards the sea, / And aye their cryin' voices trailed ahint them on the air -- " / "O Wind, hae maircy, haud yer whisht, for I daurna listen mair!"